امروز روز ميلاد حضرت فاطمه(س) هَسّه، روزي هسّه كه هَمينتاي وِسّه به  نوم جان مارون وُ  زنان  اسم بهيته. اتي روز  تمومي زنان وُ تمومي مارون ره مواركا.

 آرزو دارمي بتونيم قدر شِه مارون ره ويشتر بدونيم و قدر شِه زنا ره هم بدونيم كه صواحي تا نماشته تَجِننه مثل اتا مردي، تا زندگي خرج ره هم پيش بَوِرِن.

 قديم واري، زنان وُ مارون زحمت ره ياد نكنيم، الآن هم درنه مارون يا زناني كه، صواحي اذان گِدِر راس بوننه تا نصفه شو، هم سِره كار ره رَسِنِنه، هم دشت و صحراي كار ره، وچون كار هم كه تمومي ندارنه. الآن اتا سر دشت و صحرا بوريم، ويمّي چتي درنه دشت دله نشا كننه وُ وِشونِ تا چِشِ خِنه همه تیله.

وشون قدر ره ويشتر بدونيم وُ ، وشون حرف ره گوش هكنيم وُ  ونه جان بهوتن ره ياد بهيريم وُ ، وره  ناراحت نكنيم.

 اسا مارون، شه وچون جا هيچي نخواننه، گِننه وَچون كه سلامت بوئن وُ  خش روزگار دارن، اگه سيوا بهينه، شه زندگي دله، دلخشي دارن، امه وِسه وَسّه. دعا هم كننه كه وشون وچون شه زندگي سر، خير بخرن.

 ياد داريم اگه دير شهر درمي يا نزديك په، اتا سر  اتي روز شه جان مار ره بزنيم، تلفن پشتي هم نهوُوِه. ونه چش راه دره. نياره كه سمباري كه روشن هكرده، نماشته سر بهيه، دكوشه كه  هي….   امسال هم وچون ني يمونه و برمه چش بهوُوِه. نا خداره خش اِنه، نا خلق خداره.

 اتا شاعر كه امه هِمسَيگي دره، اتا شعر جان مار خَوري بهوته، قشنگه شِعر هسه، تقديم كمي همه مارون ره.